«Аарык» этнокультурнай киин үлэһиттэрэ «100 үтүө дьыала» аахсыйаттан туора турбакка, үтүө холобуру көрдөрдүлэр.
Кэлэктиип бары биир киһи курдук сомоҕолоһон, өр сылларга бииргэ үлэлээбит коллегабытыгар Евдокия Федотовнаҕа, уус-уран самодеятельность көхтөөх кыттыылаахтарыгар Лариса Кимовнаҕа уонна Зоя Михайловнаҕа, ону тэҥэ доруобуйатынан хааччахтаах активист, Дьэлиндэ олохтооҕор Розалия Васильевнаҕа тиийэн көмөлөстүлэр. Үлэһиттэр тиэргэн иһинээҕи хаары күрдьэн, суоллары, киирэр-тахсар ааннары ыраастаан, ыраас уонна табыгастаах усулуобуйаны тэрийдилэр. Маны таһынан, дьоҥҥо интэриниэт ситиминэн араас электроннай регистрацияны ааһалларыгар улахан көмөнү оҥордулар.
Аҕам саастаах дьоммутугар, биир идэлээхтэрбитигэр уонна көхтөөх олохтоохторбутугар маннык кыһамньы уонна көмө оҥоһуллара олус суолталаах. Бу курдук үтүө дьыалаҕа бары кыттыһыҥ, бэйэ-бэйэҕэ көмөлөсүһэ, түмсүүлээх буолуоҕуҥ!
